விஷுவல் பேசிக் 6.0 வைத்துக்கொண்டு யூனிகோட் எழுத்துக்களைக் கையாள்வது அவ்வளவு உகந்த செயல் அல்ல. விஷுவல் பேசிக்கிலுள்ள நேட்டிவ் கண்ட்ரோல்கள் எல்லாமே ஆங்கில எழுத்துக்களான ASCII டெக்ஸ்ட்டை மட்டுமே ஏற்றுக்கொள்ளும். தமிழை உள்ளிடவோ, காண்பிக்கவோ முடியாது.

ஆனால் டாட்நெட்டில் உள்ள எல்லா கண்ட்ரோல்களுமே இயல்பாகவே யூனீகோடைக் கையாளும். எனவே, டாட்நெட்டுக்கும் மை எஸ்க்யூஎல்-லுக்கும் ஒரு சுபதின சுபவேளையில் தொடர்பு ஏற்படுத்தி ப்ராஜக்டை பெற்றெடுக்க ஆயத்தம் ஆனேன். சோதனை (யாருக்கு?) முயற்சிக்காக c# அப்ளிகேஷன் ஒன்று உருவாக்கி, தமிழ்ச் சொற்கள் சிலதை மை எஸ்க்யூஎல் டேட்டாபேசினுள் உள்ளிட்டு, உள்ளே இருப்பதைப் படித்துப் பார்க்க ஒரு சிறிய நிரல் எழுதினேன்.

வெற்றிகரமாக உள்ளிட்ட பிறகும், பார்க்கும் போது வெறும் கேள்விக்குறி மட்டுமே தெரிந்தது. கொடுத்த தகவல் சரிவரப் பதிப்பிக்கப்படவில்லை.

சரி, டாட்நெட்டுக்கும் மை எஸ்க்யூஎல்க்கும் தமிழ்க்குழந்தை பெற ஜாதகப்பொருத்தம் இல்லை என்றுதான் நினைக்கத் தோன்றியது.

ஒரு சில ஆராய்ச்சி(?!)க்குப் பின், என்ன தவறு, எது சரியான அணுகுமுறை என்பதை அறிந்து கொண்டேன். வேறு யாருக்கும் பயன்படுமோ இல்லையோ, குறைந்தபட்சம் எனக்கே மறந்தால் ஒரு ரெஃபரன்சாக இருக்க இந்தப் பதிவு.

SQL Serverஉடன் கூட OleDbConnection பயன்படுத்தித்தான் பழக்கம் என்பதால், OleDbConnectionஐயே முதலில் முயற்சித்தேன். ரன்-டைமில் கண்ணாபின்னா என்று திட்டு வாங்கியதுதான் மிச்சம், mysqlprov ஒழிக!

டாட்நெட்டில் தமிழுக்கான நிரல் என்று ஆரம்பித்ததும் முதலில் கவனிக்க வேண்டியது, ஃபார்ம் ஃபைலின் என்கோடிங்க். சாதாரணமாக ASCII கோப்பாகத்தான் ஒரு கோப்பு உருவாகும். .cs கோப்பை UTF-8 without signature வடிவில் முதலில் சேமிக்க வேண்டும். இல்லாவிட்டால் நிரலுக்குள் தமிழ்ச்சொற்கள் பயன்படுத்த முடியாது. File->Save formname.cs என்று தேர்ந்தெடுத்து Save optionஇல் Save with Encoding ஆப்ஷன் செலக்ட் பண்ணியவுடன், ஒரு ஆப்ஷன் லிஸ்ட் வரும். அதில் Unicode (UTF-8 without signature) என்பதைத் தேர்ந்தெடுக்கலாம்.

ஃபார்ம் ஃபைல் உருவாக்கியவுடன் டேட்டாபேசில் இரண்டு முக்கியமான பணிகள் இருக்கின்றன. அதாவது, தகவல்தளத்திலுள்ள டேபிள் UTF8 என்கோடிங்கில்தான் இருக்கிறது என்பதை உறுதி செய்து கொள்ள வேண்டும்.

புதிதாக ஒரு டேபிள் உருவாக்கினால், கீழ்க்கண்ட SQL Query வருவது போல் இருக்கவேண்டும்.


CREATE TABLE mytable (
tableID bigint(20) NOT NULL default '0',
namecolumn varchar(255) character set utf8 NOT NULL default '',
anothercolumn varchar(255) character set utf8 not null default ''
) ENGINE=InnoDB DEFAULT CHARSET=utf8;


இதில் இருப்பது போல், ஃபீல்டுகளுக்கு character set utf8 என்பதும், டேபிளுக்கு charset=utf8 என்ற வரையரையும் மிகவும் முக்கியம்.

சரி, இது இவ்வாறு இருக்க, ஏற்கனவே உருவாக்கப்பட்டு புழக்கத்தில் உள்ள டேபிள் என்றால் என்ன செய்வது? அதற்கு, முதலில் டேபிளில் உள்ள ஃபீல்ட் எல்லாவற்றையும் utf8க்கு மாற்ற வேண்டும். பிறகு டேபிளை utf8க்கு மாற்றவேண்டும்.

alter table mytable modify column namecolumn varchar(255) character set utf8
alter table mytable character set utf8

ஒருவாறாக, டேபிள் உருவாக்கம் முடிந்தது. அடுத்ததாக, கோடிங்க்.

ஒரு ஃபார்மில் ஒரு டெக்ஸ்பாக்ஸ், ஒரு கமாண்ட் பட்டன் இருக்கிறது. கமாண்ட் பட்டனை க்ளிக் பண்ணினால், டெக்ஸ்ட்பாக்ஸில் இருக்கும் சொற்றொடர் டேட்டாபேசின் மூன்றாவது column (anothercolumn)ல் சேர்ப்பிக்கப்படும். முதல் ஃபீல்டான tableIDக்கும், இரண்டாவதான namecolumnக்கும் நிரலில் இருந்தே டேட்டா தருவது போல் அமைக்கலாம். இதனால், பயனரிடமிருந்து பெறப்பட்ட டேட்டா, ப்ரோக்ராமின் உள்ளேயே இருக்கும் டேட்டா இரண்டும் எவ்விதம் கையாளப்படும் என்பதைப் பரிசோதித்து அறிய முடியும்.

Mysql Connector/Net என்ற ட்ரைவர் பற்றி இப்பொழுது குறிப்பிடுவது சாலப்பொருந்தும். MySQL உருவாக்கியவர்களின் அதிகாரபூர்வமான வெளியீடு MySQL Connector/NET. இதை நிறுவியபின் MySqlConnection, MySqlCommand போன்ற ஆப்ஜகள் பயன்படுத்தி நேரடியாக ட்ரைவர், ப்ரொவைடர் எதுவும் இன்றி MySQL டேட்டாபேசுடன் தொடர்பு கொள்ளலாம். இது முழுக்க முழுக்க (முழிக்க முழிக்க) சுத்தமான, கலப்படமற்ற C# கொண்டு எழுதப்பட்டது.

பதிவிறக்கிக்கொள்ள, http://dev.mysql.com/downloads/connector/net/1.0.html

நிறுவிக்கொண்ட பின், Project->Add Reference சென்று MySQL Data லைப்ரரி ஃபைலை சேர்த்துக்கொள்ள வேண்டும். Component Nameல் இது இருக்காது. எனவே, அருகிலிருக்கும் Browse பட்டனை க்ளிக் பண்ணி, MySQL.Data.DLL கோப்பை தேர்ந்தெடுக்கவும். MySQL Connector/NET நிறுவப்பட்ட ஃபோல்டருக்குள் இந்த கோப்பு இருக்கும்.

பிறகு using MySql.Data.MySqlClient; என்ற டிக்ளரேஷனை நிரலின் ஹெடர் பகுதியில் சேர்த்துக்கொள்ள வேண்டும்.

இப்பொழுது code...

MySqlConnection con=new MySqlConnection("Data Source=சர்வரின்பெயர்;Database=டேட்டாபேசின் பெயர்;User ID=பயனர்ப்பெயர்;Password=கடவுச்சொல்;CHARSET=utf8");
con.Open();
MySqlCommand com1=new MySqlCommand("INSERT into mytable(tableID,namecolumn,anothercolumn) values(1,'கோடிங்கில் இருந்து தரப்படும் தமிழ் எழுத்து','"+txt.Text+"')",con);
com1.ExecuteNonQuery();
com1.Dispose();
txt.Text="Finished inserting "+txt.Text;
MySqlCommand com=new MySqlCommand("select namecolumn,anothercolumn from mytable",con);
MySqlDataReader dread=com.ExecuteReader();
while(dread.Read())
{
txt.Text=txt.Text+" "+dread[0].ToString()+" "+dread[1].ToString()+" --------- ";
}
dread.Close();
com.Dispose();
con.Dispose();

இதில் மெரூன் நிறத்தில் அடிக்கோடிடப்பட்டு இருக்கும் CHARSET=UTF8 என்ற வரையரை மிக மிக முக்கியம். அப்படி ஒரு சொல் இருந்தால்தான் நம்முடைய mysql கனெக்ஷன் யூனிகோட் அடிப்படையில் இருக்கும்.

மேற்குறிப்பிட்டவைகளில் ஏதேனும் ஒன்று தவறினாலும், டேட்டாபேசிலுள்ள டேபிளில் வெறும் கேள்விக்குறிகள்தான் சேமிக்கப்படும். 'என்ன இது, வெறும் கேள்விக்குறி கேள்விக்குறியாக இருக்கே? எல்லா டேட்டாவும் போச்சா?' என்று அதிர்ச்சியடைய நேரிடும். :-)

தொகுத்து பாய்ண்ட் பாய்ண்டாக சொல்லவேண்டுமென்றால்...

டாட்நெட் மற்றும் மை எஸ்க்யூஎல் கொண்டு தமிழ் சார்ந்த மென்பொருள் உருவாக்க:

1. ஃபார்ம் ஃபைல் Save with encoding, Unicode (UTF-8 without signature) என்று சேமிக்கப்படவேண்டும். இல்லாவிட்டால் நிரலுக்குள் தமிழ்ச்சொற்கள் பயன்படுத்த முடியாது.
2. கனெக்ஷன் ஸ்ட்ரிங்கில் CHARSET=UTF8 என்பது மிக, மிக முக்கியம். மை எஸ்க்யூஎல்லுடனான தொடர்பு யூனீகோட் அடிப்படையில் அமைய இக்குறிப்பீடு மிகவும் அவசியம்.
3. டேபிள் உருவாக்கும் போது, ஃபீல்ட் பண்புகளில் character set=UTF8 என்ற வரையரை வேண்டும்
4. டேபிள் encoding characterset=utf8 என்று இருக்குமாறு பார்த்துக்கொள்ள வேண்டும்